தலை தீபாவளி

எலோருக்கும்
இன்று தீபாவளி

உன் ஆடைகளுக்கு
மட்டும் தலை தீபாவளி

அது என்ன
தலை தீபாவளி?

இன்று தானே
அவை அணிகின்றன உன்னை
முதன் முதலில்

பேரழகி

உன்னை யார்
பேரழகியாய்
பிறக்க சொன்னது

வெறுமையாகவே
நிரம்புகின்றன
உனக்கான கவிதைத்
தாள்கள்

உவமை தேடலிலேயே
முடிந்து போகின்றன
பொழுதுகள்
ஒவ்வொரு நாளும்

சிரிப்பு தேவதைகள்

உதடு சுழித்து
கன்னத்தில் குழி விழ
சற்றே தலை சாய்த்து
ஓரக் கண்ணால்
இன்னும் இருக்கிறது பட்டியல்

நீ அழகிய தேவதை,
உன் சிரிப்பினுள்
எத்தனை தேவதைகள்

ஜன்னல்கள்

உன் வீட்டில்
நிறைய ஜன்னல்கள்

முன்னறையில்,பக்கவாட்டில்,
படுக்கையறையில்

எல்லாமும்
சாலையை நோக்கியதாக
எனக்கொரு ப்ரமை

ஒவ்வொரு முறையும்
எல்லா ஜன்னல்களுக்குப் பின்னாலும்
பார்துவிடுகிறேன்
உன் கண்களை

உன் பெயர்

என்ன
தோன்றினாலும்

கிறுக்கலாக
எழுதிவிட முடிந்த என்னால்

உன் பெயரை மட்டும்
அழகாகத்தான்
எழுத முடிகிறது

உன் விரல்கள்

எப்பொழுது
தரப்போகிறாய் நீ

பழைய சோற்றுடன்
தொட்டுக்கொள்ள
உன் விரல்களையும்